صلاح جاهين

كله يقف فى الصف
اللى نقوله تمام ينعاد
م الجد .. لحد الاحفاد
والحاكم والشيخ اسياد
والباقى على الرف
كلة يقف فى الصف
*********
ناكر فضل وعدل المولى
وانت لا قوة ليك ولا حول
حبل الصبر فى اخر جولة
فى رقبتك يتلف
كله يقف فى الصف
*********
انت خروف من ضمن قطيع
بات معلوف والصبح مطيع
تعمل فيها اسد .. وشجيع
بفضيحة هاتتزف
كله يقف فى الصف
*********
تحلم بالعدل يا غندور
وتعيش حرية بلا سور
طاير وجناحك مكسور
والاحلام ليها سقف
كله يقف فى الصف
**********
خارج برة السرب ونافر
خاين لو فى سياسة تعافر
لو تعقلها فى دينك كافر
والله وعقلك خف
كله يقف فى الصف